القرش الأبيض ينفع في الBlack Fraiday

القرش الأبيض ينفع في اليوم الأسود  حكمة قالوها زمان وكان عندهم حق لدرجة ان الأجانب عملو جمعة سموها الجمعة السوداء

(Black Friday )

دي ليها قصة طويلة عريضة  ممكن تراجعها من اللينك دا  المهم ان اليوم دا كل المتاجر في الولايات المتحدة وكندا وبريطانيا بيعملو تخفيضات علي كل المنتجات والماركات العالمية والمشهورة  الموضوع بيوصل ان ممكن تلاقي خصم يصل٦٠ و ٧٠ ٪ علي بعض المنتجات

الاسعار اللي بتبقي معلنة هي اسعار حقيقية يعني لو تلفزيون سامسونج مثلا كان تمنة ١٠٠٠ دولار ولاقيت الخصم ٥٠ ٪ بيبقي التلفزيون ثمنة الفعلي في السوق ١٠٠٠ دولار وبعد الخصم تلاقية بقي ٥٠٠ دولار

فين المشكلة بقي ؟؟

مافيش مشكلة خالص دا احنا حتي عجبتنا الفكرة في الوطن العربي وكتر خيرهم مواقع البيع اونلاين حبيت تعمل بلاك فرايداي بس عربي وطبعاً ماينفعش حضرتك نسودها في وش الناس ف حبينا نخليها حاجة مبهجة ف اخترعنا 

الجمعة البيضا

وهي فعلا بيضا وبصفارين كمان 

يعني مثلا علي سبيل الشلل هتدخل علي اجدعها موقع بيع اونلاين هتلاقي في العروض 

مثلا تابلت صيني متقفل تحت بير السلم في الصين طبعا  ثمنه في السوق ٣٥٠ جنية بيتباع علي الموقع قبل الجمعة البيضا ب ٥٥٠ وفجأة الخصومات تنزل فيقولك ان التابلت دا ثمنة قبل الخصم ٨٠٠ جنية وعلشان الجمعة البيضا وعلشان حضرتك يا بيضة هنخليهولك ٥٤٩ جنية عشان تهيص ياعم وطبعا الزبون هيهيص

الأكيد بقي انك مش هتلاقي  ولا منتج من شركة معروفة ولا هتلاقي عليه خصم حقيقي

دا غير ان لاقيت موقع بيقول انه عرض ايفون ٦ اس بخصم ٢٠٠٠ جنية دخلت علي الموقع ومالقتش المنتج معروض من اساسه في صفحة العروض

التفكير الضيق عندنا هيفضل موجود للأسف 

الدول اللي بتعمل فعلا عروض حقيقية بتحقق مبيعات بتصل لميارات الدولارات وبالتالي بيدخل لخزينة الدولة ملايين الدولارات من الضرائب في يوم واحد اليوم دا بيشتري فيه الناس من داخل وخارج الدولة من دول كتير وشركات الشحن دلوقتي سهلت  عملية الشراء من بره لما عملت عناويين ليك في اكثر من دولة من خلالها تقدر تشتري وتشحن وتدفع جمارك وضرائب في بلدك وبرضو السعر ارخص من عندنا

احنا لسة بندور ازاي ننصب علي بعض .